2016年4月29日 星期五

心理質素

講起持股既心理質素,唔知大家買完股票之後個心係諗咩呢。講返我自己,初初買股票真係幾秒就睇一次,禁到個F5制都爛埋咁滯。但慢慢發覺咁樣真係唔多掂,愈睇得密,心理上就愈跟市場上上落落。升幾仙就好開心,跌幾仙又好唔開心,仲CHOK過過山車。同埋睇得多就trade得多,炒出炒入最後得個吉或者蝕埋。最開心應該係證券行因為佢可以賺哂你D

最後練練下先練到用長線心態持倉,依家一日都未必睇一次報價。可能有人會話你咁樣如果個市有咩事你咪走唔切囉。我自己就覺得一兩日既波動其實都代表唔到D咩,起碼都要幾日或者一星期以上既走勢先有參考價值,依家資料實在太多啦,市場好易CHOK上CHOK落,假消息太多,大戶好中意放風出黎試個市場。好似之前油價波動真係一日升一日跌,跟得貼好似俾人左一巴右一巴我自己就中意收市先睇慢慢研究,唔好俾個市帶住你走。當然最高境界就好似曾教授提出既手中有股,心中無股,不過小弟都自問未做到HAHA共勉之

2016年4月24日 星期日

股票持倉

講到股票持倉,小弟就主要都係渣大陸股依家主要就持有以下呢幾類:(i) 中國劵商(ii) 中國資源(iii) 航運當然好多人話大陸經濟下行,債務問題,準備支爆。但我覺得作為一個咁大型既經濟體系有6%以上既增長係好唔錯既數字。同埋呢巴菲特都話睇好中國就令我有更大信心,佢老人家睇長線野都好少錯。始終買股票第一樣係買緊個個地方既前景,即係國運如果你覺得個個地方係經濟前景係長期向下你就千其唔好買。正如如果你廿年買日本股票咁都唔知幾時先返到身。而我就對中國既長遠前景有信心。不過我都興幸市場唔太看好中國,唔係既話又點可能用一個平價錢去入貨。正所謂有危先有機

財務自由和簡單生活

第一次寫BLOG,其實都係想作為一個紀錄自己投資既心路歷程。不過係細說自己投資之路之前,我都想講講自己投資既目的

同好多人一樣,我投資都係為左財務自由。簡單黎講就係唔洗做都有錢去支持到自己既生活,呢個概念係我睇窮爸爸富爸爸學返黎既,呢本書我覺得真係每個人都要睇一睇,睇完之後分分鐘對你既人生有唔細既正面影響。起碼令你對資產同支出建立正確既概念財務自由之後又點呢?其實真係要到時先知。不過呢一刻我諗自己財務自由之後只想要簡單生活。每日可以悠閒咁食個早餐,可以用心咁睇下呢個世界,可以同自己既愛人生活,或者已經係我最想要既生活

不過現實還現實,係財務自由之前我都仲係一個每日營營役役既打工仔,每日係屋企既清醒時間都唔夠三粒鐘。所以呢,為左自己既夢想,做好投資就係我諗到最可行既方法。當然有人會話不如做生意仲好,不過自問自己真係唔係呢方面既材料哈哈,講投資。小弟2009年開始投資,記得當年岩岩考完ALEVEL冇野做就去左恒生開左個投資戶口。第一次買股票就係8字頭股,買左幾日就升左幾成當然當自己股神啦,之後就梗係慘淡收場。頭一年都係不斷地炒出炒入,市面上既投術指標都差唔多睇哂。試過係大學year1 2010年一晚就輸左成皮野,對一個學生黎講都咪話唔大打擊。不過當年其實輸極都係有限錢,反而學到就係對市場要謙卑。後生輸錢都好過人到中年先幾十萬都輸,到時都唔知點返身

時間去到岩岩畢業出黎做野2014年,我開始學習長線投資去滾大自己舊錢之餘同避免太focus市場短期波動。個個月都睇幾本財經書,始終都係覺得書本講既野係比較comprehensive。而機緣巧合既情況下我認識左曾淵滄教授既曾氏通道曾氏通道既詳情大家可以GOOGLE下,大概就係利用數學對數整既一個圖。重點係呢個圖捉哂牛市頂同底。其實我都唔係好明點解咁少人講呢個圖,可能因為香港人天生心急注重短線獲利曾氏通道呢D分分鐘幾年先出一次訊號既工具就冇人理。小弟個個星期都睇一睇恒指既曾氏通道。做唔做到財務自由一定程度上就靠佢。而關於曾氏通道係之後既日子我仲會再講多D



股票暫時係我唯一既投資,而我渣緊咩股就之後再談。不過其實我覺得如果當投資組合去到一定規模既時候係唔應該淨係得股票既,所以樓市,債券,ETF我都有留意。但小弟依家本少就唯大靠股票去滾大舊錢先,之後先再諗其他波動性冇咁大既投資工具啦

第一篇文就講到呢度先,行文不順請多多見諒。點都好,係香港有錢先有選擇既權利,希望大家都可以早日憑正途財務自由,早日擺脫行屍走肉既日子每日過自己喜歡既生活